काठमाडौं । आजभोली समाजमा धेरै चकित हुने गरी घटनाहरु घटिरहेका छन् । हिन्दी सिनेमा जगतबाट एउटा चकित पार्ने खबर बाहिर आएको छ । बलिउडका चर्चित कला निर्देशक नितिन देसाईले बुधबार बिहान आत्महत्या गरेका छन् । उनको मृत्युको खबर सार्वजनिक हुनासाथ सबै चकित भएका छन् । चलचित्र जगतमा सन्नाटा छाएको छ । भर्खरै मात्र नेपाली कलाकार सारुक ताम्राकारले आत्माहत्या गरेको घटना सेलाउन नपाउँदै बलिउडमा फेरि अर्को दुःखद घटना घटेको छ । प्राप्त जानकारी अनुसार नितिन देसाईले बिहान ४ः३० बजे एनडी स्टुडियोमा झुण्डिएर आत्महत्या गरेका थिए । उनको मृत्युको कारण आर्थिक अभाव रहेको बताइएको छ ।नितिन देसाई कर्जतस्थित उनको एनडी स्टुडियोमा मृत फेला परेका छन् । उनको मृत्युको कारणबारे प्रहरीले थप विवरण भने दिएको छैन । तर उनले आत्महत्या गरेको बताइएको छ । प्रहरीले घटनास्थलमा पुगेर अनुसन्धान सुरु गरेको छ ।

नितिन देसाईले उत्कृष्ट कला निर्देशकको रूपमा ४ पटक राष्ट्रिय पुरस्कार पनि पाएका थिए । दुई दशक लामो आफ्नो करियरमा, नितिन देसाईले बलिउडका धेरै प्रसिद्ध फिल्म निर्माताहरूसँग काम गरे, जसमा सञ्जय लीला भन्साली, विधु विनोद चोपडा, राजकुमार हिरानी, ​​आशुतोष गोवारीकर जस्ता ठूला नामहरू थिए। चलचित्र जगतमा उनको योगदान अतुलनीय छ ।